​感謝各位觀眾的支持，一連8場的演出已圓滿落幕！一桌兩椅將繼續帶來優質的節目♫

「今晚想食咩嘢餸？」「想食雞翼、番薯同雪糕！」有冇諗過日常對話都可以係歌詞？

「冬懂凍棟篤，公貢谷共局」聽落有咩分別呢？平時我哋高低音分明嘅廣東話，夾埋音樂嚟講故仔，就係非物質文化遺產嘅「南音」？小樂樂喺做功課嘅時候，發現南音呢種生動嘅聲音同獨特嘅溫度，原來一代傳一代噉收埋喺自己同媽咪、公公嘅日常生活之中！

粵劇名伶阮兆輝首次登上兒童劇場！加埋伍卓賢融會古今中西樂曲嘅音樂、新世代填詞人陳耀森（亞木）嘅貼地歌詞，現場仲有唔受傳統演奏模式局限嘅結他、胡琴同古箏伴奏，一齊孖住最鍾意為小朋友講故仔嘅雪姐姐，敲住擊木，齊齊唱唱噏噏講故仔，投入《樂樂公公唱唱貢》呢個前所未有嘅南音故事旅程！